Farbige Clip

Farbige Clip

Dört uf dem farbige, zuckende Bildschirm 
e Huufe vo tanzende Lüüt
zmittsdrin es brandheisses Model, dernäbe
e dräckig grinsende Typ
d’Stärne schiine vom tiefblaue Himmel
und plötzlech ghört me die Stimm
s’Glück sigi das und e offeni Fläsche
wie dä Fusel heisst, weiss i grad nümm

Die, won i kenne gsei sälte so us
wie die gstylte Type im Clip 
bi mit kem Model befründet und finde
das trendige Gsöff nid so hip
Aber sitdäm i die Bilder ha gseh und 
gmerkt ha um was genau goht 
weiss i wie schlimm`s um mis truurige Läbe
in Würklechkeit eigentlech stoht.

Bsuechet drum dir, wo mit Models bekannt sit
e Party am beschte no hüt
nämet die farbigi Fläsche und 
all euri coole Fründe grad mit
Denn euses mönschliche Läbe uf Ärde
das müesst der zuegä isch miis
doch wenn d’emol gmerkt hesch 
wie eifach s’Glück zha isch
denn zahlsch mit me Lächle der Priis